Á rafmagns fjallahjólum um Annapurna svæðið í Nepal

Stórkostleg ferð á rafmangs fjallahjóli í skugga hæstu fjalla heims, átta þúsund metra tindanna Annapurna og Dhaulagiri.
Við fylgjum gömlum þjóðleiðum milli Nepal og Tíbet. Heimsækjum aldargömul klaustur og hof og upplifum heillandi menningu íbúa svæðisins.
Ferðin er sett upp sem stutt og hnitmiðuð hjólaferð um Annapurna svæði Nepal.
Gist er á góðu hóteli í Katmandu og farin skoðunarferð um borgina.  Flogið er til borgarinnar Pokhara og þaðan yfir Himalayjafjallgarðinn upp í þorpið Jomsom. 
Hjólaðir eru 5 dagar og gist í tveggja manna herbergjum með baði á leiðinni.  Eingöngu er hjólað með létta dagspoka og allur farangur fluttur á milli gististaða.
Í lok ferðar er slakað á á góðu hóteli með sundlaug í Pokhara.

Dagsetning: 15. til 24. nóvember 2026.
Leiðsögumaður er Leifur Örn Svavarsson.
Verð: 540.000 kr, miðað við 2 í herbergi.
Aukagjald fyrir eins manns hótelherbergi í Kathmandu og Pokhara er 32.000 kr.
Lágmarksfjöldi eru 6 og hámarksfjöldi 12.
Leiga á fulldempandi rafmagnshjóli er 70.000 kr.

Erfiðleikastig ferðarinnar:
Þátttakendur þurfa að vera í góðu líkamlegu ástandi, með gott jafnvægi og vanir að hjóla grófa malarvegi. Frá Jomson fylgjum við vegum um hrjóstrug landamærahéröð Tíbet. Stærstan hluta ferðarinnar er hægt að sitja á hnakknum þegar við hjólum, en einstaka sinnum getur verið betra að standa á hjólinu, þegar farið er yfir stutta erfiða kafla. Hálfur dagur er niður göngustíg í Lubra dalnum og er það tæknilega erfiðasti hluti leiðarinnar.  Hægt er að fara aðra leið og sneiða frá þeim erfiðleikum, en Lubra dalurinn gríðarlega fallegur, með stórbrotnu útsýni yfir snævi þakta tinda Himalayafjalla sem rísa yfir dalnum og vel þess virði að fara niður dalin þó að hjólin séu teymd yfir helstu erfiðleika á leiðinni. Aðra hluta leiðarinnar fylgjum við gömlum þjóðleiðunum Annapurna gönguleiðarinnar á misgrófum vegum og góðum stígum.  Öryggisbúnaður er hjálmur, hanskar og hnéhlífar.

Rafmagns fjallahjólin:
Hjólað er á nýlegum  rafmagnshjólum með bæði fram- og aftur dempara. Ekki er hægt að ferðast með rafmagnshjól í flugi, hægt er að leigja hjól í Kathmandu og kostar það 70.000 kr.

Dagskrá ferðar:

Dagur 1 - Koma til Kathmandu.
Akstur frá flugvelli á hótel miðsvæðis í Kathmandu.
Gist á hóteli í tveggja manna herbergjum, kvöldverður innifalinn.

Dagur 2 - Skoðunarferð um Kathmandu.
Eftir morgunverð er ferðin undirbúin, farið yfir ferðatilhögun, leiguhjól mátuð og still. Eftir fundinn eru hjólin sett á bíla og þeim ekið til Jomsom.
Eftir hádegisverð er skoðunarferð um miðbæ Kathmandu.  Þar er af mögu að taka, en innan borgarinnar eru 7 staðir á heimsminjaskrá UNESCO.
Gist á hóteli í tveggja manna herbergjum, kvöldverður innifalinn.

Dagur 3 - Kathmandu – Pokhara.
Flogið til Pokhara fyrir hádegið en þangað er um 25 mín flug frá Kathmandu.  Eftir að hafa komið okkur fyrir á hótelinu er góður tími til þess að skoða borgina.
Pokhara er fallega staðsett við stórt stöðuvatn, hún er skemmtileg og aðgengileg borg með iðandi mannlífi.
Gist á hóteli i tveggja manna herbergjum, fullt fæði.

Dagur 4. Pokhara – Jomsom (2.800 m) – Kagbeni (2.910 m).
Vegalengd 14 km, tímalengd um 5 klukkustundir.
Snemma morguns er flogið frá Pokhara til Jomsom, flugið er stutt en með stórkostlegu útsýni yfir Himalayafjöllin.  Flogið er milli fjalla risanna Annapurna og Daulagiri. Við borðum morgunverð við komuna til Jomsom áður en við hjólum af stað. Áfangastaður okkar, Kagbeni er ótrúlega fallegt fjallaþorp í Tíbeskum stíl. Þorpið er staðsett á mörkum “Efra Mustang héraðs” sem var sjálfstætt konungsríki og lokað ferðamönnum til 1992. Mustang eða Lo konungsríkið leggst ekki af fyrr en 2008 og þó að nú sé kominn torfær vegur þá er menningin einstök. Það er gaman að koma hjólandi inn í Kagbeni, gefa sér tíma til þess að skoða 600 ára gamalt klaustrið, sem er eitt elsta Búdda klaustur heims og ganga um gamla virkisbæinn sem er enn eldri. Staðsetning Kagbeni var mikilvæg í saltversluninni frá Tíbesku hásléttunni og er þorpið útvörður Tíbeskar menningar. Í Kagbeni og í Efra Mustang héraði búa tíbetar, en neðar taka aðrar þjóðir við af þeim 130 þjóðum og tungumálum sem byggja Nepal.
Gist í tveggja manna herbergjum á gistiheimili í Kagbeni, fullt fæði.

Dagur 5 - Kagbeni (2.800m) - Muktinath (3.760 m)
Við höldum áfram á hjólum í gegnum strjálbýl sveitahéruð, ávaxtatré og jakuxa beitilönd upp undir hæsta skarð Annapurna gönguleiðarinnar. Þar erum við komin í það mikla hæð að þó að stígurinn sé aflíðandi þá erum við þakklát fyrir að hafa rafmótor til þess að hjálpa okkur við hjólreiðarnar.  Sandsteinsklettar eru áberandi og aldargamlir manngerðir hellar, sem eru einkennandi fyrir Efra Mustang hérað.  Skemmtilegur göngustígur Annapurna gönguleiðarinnar leiðir okkur að Muktinath klaustrinu, einu af heilögustu hofum Hindúa, sem laðar að sér fjölda nepalskra og indverskra pílagríma. Þar gefst okkur tækifæri til þess að skola af okkur syndir okkar með því að ganga undir 108 heilagar uppsprettur hofsins. 
Gist í tveggja manna herbergjum á gistiheimili í Muktinath, fullt fæði.

Dagur 6 - Muktinath (3.760m) – Marpha (2.690 m).
Vegalengd um 30 km, 150 m hækkun og 1250 m lækkun. Tímalengd 6-7 klukkustundir.
Það er stutt vegalengd upp í Lubra skarðið. Lubra dalurinn er ein fallegasta hjólaleið Nepal og útsýni til Himalyafjallanna á sér ekki hliðstæðu. Framundan er þriggja daga samfelld hjólun úr 4.000 m hæð í hrjóstrugum Himalayafjöllunum niður í 700 m hæð í regnskógum Nepal. 
Við fylgjum einstigi yfir hrygginna, sem afmarka Lupradalinn og fylgjum gömlum þjóðleiðum niður í þröngan dalbotninn. Á áraurunum er myndrænt smáþorp í tíbeskum stíl sem komst í vegasamband fyrir örfáum árum. Mishæðóttur grófur vegslóði leiðir okkur niður þennan hliðardal, niður að Kali Gandaki ánni. Við fylgjum mishæðóttum malarvegum til Thinigson, fallegu þorpi þar sem við borðum hádegismat á frumstæðum þak veitingastað með útsýni yfir þorpið.
Við fylgjum fáförnum sveitavegum að frumstæðri brú á Kala Gandaki ánni, en síðasta spölin niður til Marpha fylgjum við megin veginum. Það er gaman að koma hjólandi þröngar hellulagðar göturnar inn í Marpha. Við komum okkur fyrir á hóteli og skoðum fallegan bæinn, sem er frægur í Nepal fyrir eplarækt, fersk og þurrkuð epli og epla vín. 
Gist í tveggja manna herbergjum á gistiheimili, fullt fæði.

Dagur 7 - Marpha (2.690 m) – Tatopani (1.190 m).
Vegalengd 50 km, um 300 m hækkun og 1.800 m lækkun.Tímalengd 7-8 klukkustundir.
Við færum okkur aftur yfir á austur baka Kali Gandaki árinnar og fylgjum þar göngustígum Annapurna gönguleiðarinnar gegnum sveitir og lítil þorp. Við förum í gegnum tíbeskar flottamannabúðir frá innrás Kínverja í Tíbet, en þar er nú komin varanleg byggð. Stígurinn hlykkjast í gegnum furuskógar lundi með útsýni upp til snævi þaktra 8 þúsund metra hárra tindanna Annapurna og Daulagiri, en þegar líður á daginn verður gróðurinn samfeldari. Það er vel þess virði að teyma hjólin upp nokkrar stuttar brattar brekkur til þess að geta haldið okkur á göngustígunum. Leiðin liggur niður með ánni gegnum dýpsta gljúfur jarðar með fjölda fossa sem steypa sér niður brattar fjallshlíðar og kletta. Seinni hluta dagsins herðir heldur betur á okkur því við lækkum okkur um 1000 metra á vegi sem bæði er grófur, bugðóttur og með spennandi brekkum. Þorpið Tatopani er frægt fyrir heitar uppsprettur og þar er upplagt að skella sér í heitu pottana í lok skemmtilegs dags.
Gist í tveggja manna herbergjum á gistiheimili, fullt fæði.

Dagur 8 - Tatopani – Ghaleshwor og akstur til Pokhara.
Vegalengd 22 km, tímalengd um 3 klukkustundir.
Í dag höldum við til baka til Pokhara. Leiðin liggur eftir jeppaslóða sem er að mestu leyti á flatlendi en með einstaka brekkum, bæði upp og niður. Þröngur fjalla dalurinn opnast upp þegar við komum til þorpsins Beni og þaðan fylgjum við megin veginum til Ghaleshwor þar sem við setjumst upp í bíla og fáum skutl til Pokhara. Í Pokhara getum við slakað á á sundlaugarbakkanum eða farið í nudd á góðu hóteli. 
Gist á hóteli i tveggja manna herbergjum, fullt fæði.

Dagur 9 - Pokhara – Kathmandu.
Það er upplagt að nota fyrrihluta dags í Pokhara. Þeir sem það vilja geta farið “paragliding” með útsýni yfir Himalayafjallgarðinn, rölt um miðbæinn, heimsótt fjallasafnið eða slakað á við sundlaugarbakkann.  Seinni part dags fljúgum við aftur til Katmandu.
Gist á sama hóteli og í upphafi, i tveggja manna herbergjum, fullt fæði.

Dagur 10 - Heimferð.
Akstur á flugvöllinn og ferðin heim hefst.

Innifalið í verði:
Undirbúningsfundur fyrir ferð.
Leiðsögn Nepalsk hjólaleiðsögumanns og íslensks fararstjóra.
Öll gisting í Nepal, 5 nætur á hóteli og 4 nætur á gistiheimilum (tehúsum heimamanna).
Allur matur á meðan á ferð stendur.
Flug til og frá Pokhara.
Flug til Jomsom.
Flutningur á hjólum með flugvélum og bílum innan Nepal.
Flutningur á farangri milli gististaða.
Skutl frá Galeshwor til Pokhara.
Gjöld og ferðaheimildir innan Nepal
Ferðir til og frá flugvelli í Pokhara og í Kathmandu.
Viðgerðarsett fyrir reiðhjól, lyfjakista með sérhæfðum lyfjum og gervihnattasími.

Ekki innifalið:
Flug milli Íslands og Kathmandu.
Vegabréfsáritun, ferðatryggingar og þjórfé til heimamanna.
Leiga á rafmagns fjallahjólum.
Persónuleg eyðsla eins og aðgangur að neti, drykkir og hleðsla á raftækjum.

Bókun ferðar:
Hægt er að bóka ferðina með því að senda póst á info@slod.is og greiða í framhaldi af því 70.000 kr staðfestingargjald.
Staðfestingargjald er að fullu endurgreitt ef fella þarf niður ferðina.
Lokagreiðsla er innheimt 2 mánuðum fyrir ferð.